البويضة.. بقلم: مايسة محمد

مايسة محمد

مايسة محمد

خلية وحيدة عاجزة ضعيفة متقدرش تحمي نفسها ولما يحصل اتحاد مع الحيوان هتبدا تتحرك من قناة فالوب متجهة للرحم طيب البويضة المخصبة دي خلية مستديرة ملهاش زعانف ولا ارجل طب ازاي بتتحرك في اتجاه الرحم وهنا هنشوف الخلق المرتب والمحسوب بأن خلايا القناة كلها عبارة عن اهداب زي الشعيرات الدقيقة اللي بتتحرك بطريقة التمايل المدروس عشان تنقل البويضة للهدف المنشود
لما بتتخصب بالحيوان المنوي بتبدا تنقسم إلى2 وبعد كده 4 وبعدين 8 و بعدين 16 وبعدين 32 وهكذا
بس دا ينقلنا لنقطة مهمة ان الانسان هيبقى كتلة لحم من خلايا متشابهة وزي بعض في الشكل وده مش بيحصل أبدا
هنلاقي الخلايا اللي ملهاش وعي بتبدا تشكل مجموعة من الخلايا لوحدها عشان تكون الدماغ والهيكل
وتبدأ خلايا الدماغ في الانقسام لحد ما توصل لعشرة مليار خلية و تبدأ بردو الخلايا تكون وصلات عصبية دقيقة تربط ما بينها والحقيقة ان الوصلات دي محتاجة ان الخلايا يكون ليها عقل يفوق عقل الانسان نفسه لكن المدهش ان الخلايا دي ملهاش أي عقل.
مش بس الدماغ بردو باقي الاعضاء هنلاقي ان الخلايا اللي أصلها متشابه وجاية من خلية واحدة مرة واحدة جزء بيستقل بنفسه وبيبدا فجأة يتجه في مكان لوحده ويكون القلب
منين اتعلمت الخلايا انها تتجه وترتبط ببعضها زي ما يكون جالها أمر مفاجئ انها تعمل ده وتسيب المكان اللي كانت فيه عشان تقوم بوظيفة تانية مختلفة
البروفيسور جواد بابونا بيقول مين اللي علمها انها تعمل كده و تغير مكانها ووظيفتها غير أنه أمر رباني من اللي خلقها
مجموعة من الخلايا ازاي تتشكل بالابداع ده كله وتكون مع بعض اشكال اسطوانية غاية في الدقة والابداع عشان تكون بعد كده شبكة كبيرة وتكون الأوعية الدموية اللي من خلالها بتحصل الدورة الدموية اللي كلنا عايشين بفضلها واللي لو حصل انسداد في جزء واحد منها بيحصل تهديد للحياة
جزء من خلايا اليد بيقوم بشيء محير جدااا بيقوم بان بعض الخلايا بتاكل التانية عشان تكون فراغ اللي بعد كده هيصبح الفراغات اللي بين الصوابع و ده عشان الجنين يتولد باصابع مفرقة
طب مين اللي عرف الخلايا ان الجنين لازم يكون له أصابع ،إنه الخالق سبحانه
الخلايا في بطن الأم في مكان معين بتبدا تكون الساق والأرجل رغم جهلها التام بأن الجنين هيحتاج للمشي بعد ما يتولد
وفجأة تحصل حفرتين في تجويف الدماغ و يبدأ قسم من الخلايا يكون خلايا العين المختلفة ،جزء بيكون العدسة وجزء بيكون القرنية وجزء الشبكية واحنا نتهبل بقى ونقول ازاي للمرة الألف خلايا معدومة العقل و كمان متشابهة المنشأ تكون خلايا مختلفة لنفس العضو و يتولد الجنين بأفضل عدسة كاميرا على وجه الأرض
وكذلك جزء تاني يبدأ في مهمة تكوين الخلايا المسئولة عن أفضل جهاز لاقط للأصوات وهو الأذن بكل تفاصيلها وطبقاتها
هنكمل المرة الجاية حكاية الجنين المذهلة.

نشر