وجهات نظر

العلاقة المجهدة.. بقلم: محمد قنديل

مبدئيا كدة لازم نبقى متفقين أن أي حد فينا لما بيقرر إنه عايز يدخل علاقة جديدة بيبقى الهدف الأساسي منها إنه يبقى مستريح و يبقى مبسوط،محدش فينا لما بييجي يخطب ولا يتجوز بيقول أنا هروح أخطب بقى عشان عايز أعكنن نفسي شوية،،،أو واحدة بتوافق على خطوبة مثلا عشان ناقصها شوية خنقة.

آمال اية اللي بيحصلنا بالظبط؟
اللي بيحصل إننا مش فاهمين إن العشرة غير، مش فاهمين إن الراجل والست لما بيقعدوا في بيت واحد في مقاييس كتير بتتغير،إذا كان في مثل بيتقال على الأصحاب بيقول
تعرف فلان…اه….عاشرته…. لأ….يبقى متعرفوش.

فللأسف إحنا بنفكر في ال هيصة والضحكة والخروجة بتاعت الخطوبة أو زي ما بيقولوا لهفة البدايات، بس للأسف مبنفكرش في وكسة النهايات اللي بتاخد في وشها حاجات كتير
من صحتنا ونفسيتنا وحياتنا وعيالنا اللي ملهمش ذنب في اختياراتنا الغلط،
المهم إننا بعد ما بنرتبط بنكتشف شوية حاجات بتحول العلاقة بقدرة قادر لعلاقة مجهدة، العلاقة المجهدة يعني..
-انك تبقى محتاج تبرر كل تصرف بتتصرفة
-انك تبقى محتاج تبرر كل كلمة بتقولها
-انك تبقى محتاج تبرر كل شعور بتحس بيه
-انك تبقى بتفكر في كل حاجة قبل ما تعملها لا تتفهم غلط
-انك تبقى علي طول قاعد على أعصابك مستني الخناقة هتيجي من أنهي زاوية بالظبط

-انك تخاف تقول اللي بييجي في بالك لا يتفهم بمعنى تاني غير اللي انت تقصده
فتكتشف في ساعتها انك مجهد، مش جسمك اللي مجهد.. لا دماغك، دماغك شغالة ٢٤ ساعة و بقى محور حياتك كلة محاولة إرضاء الطرف الآخر
عشان اليوم يعدي على خير من غير مشاكل  ونكد وخناق.
عشان اليوم يعدي عادي وهادي من غير شد وجذب.
عشان اليوم يمشي سلس من غير عقد و كلاكيع
عشان تحط دماغك على المخدة بليل وانت بالك مرتاح من غير ما تفكر خناقة بكرة هتبتدي ازاي.

طيب هي العلاقة المجهدة دي بتأثر على حاجة غير الطرفين؟
طبعا
وأول حاجة بتأثر عليها هي شغلهم،بدل ما كل واحد يبقى مركز في شغله وأنه إزاي يعمل لنفسه أو لنفسها مستقبل كويس بيبقى مركز في المشاكل والخناقات ويلاقي نفسه طول اليوم بيفكر يتفادى المشكلة إزاي أو تلاقيها طول اليوم بتفكر هتعدي اليوم من غير مشاكل إزاي.

تاني حاجة بتتأثر هي تربية الأولاد،الأولاد اللي بدل ما الطرفين يركزوا معاهم في مستقبلهم و دراستهم وتمارينهم بيلاقوا نفسهم أهملوهم أو مش مديينهم حقهم كما يجب أن يكون ده غير طبعا إن الأولاد بتطلع معقدة و كاره حاجة أسمها جواز من كتر المشاكل و الخناقات
عشان كده دايما بقول إن الأولاد تتربى بين زوجين بعيد عن بعض بس بيحترموا بعض أحسن ما تتربى بين زوجين عايشين مع بعض بس مولعين في بعض.

العلاقة المجهدة قادرة إنها تقتل أي حب كان بين اتنين، مش بس تقتله لا دي بتنسفة من على وش الأرض.
كنوز الدنيا كلها متساويش راحة البال أقسم بالله.
وللحديث بقية مادام في العمر بقية..

الوسوم

مقالات ذات صلة

زر الذهاب إلى الأعلى
إغلاق
إغلاق