اخترنا لكهو وهيوجهات نظر

العنوسة كنز لا يفنى.. بقلم: منه عامر

 

أنا مش قادرة افهم الناس عندهم بعبع من كلمة عنوسة ليه…!  ومعرفش ليه مرتبطة بالبنات مع إنها فى المعجم على الاتنين عَنَسَتِ الْبِنْتُ : طَالَتْ عُزُوبِيَّتُهَا وَلَمْ تَتَزَوَّجْ

عَنَسَ الرَّجُلُ : أَسَنَّ وَ لَمْ يَتَزَوَّجْ …. فليه بنفرق بقاااااا…!

وبعدين مين حدد سن العنوسة.. أنا بقا شايفة ان العنوسة  كنز لا يفنى … العنوسة مش مرض .. المرض الحقيقى فى مخك أيها المواطن/المواطنة المصرية.. العانس ليها/له بعد نظر.. قولولى إزاى.. اقول لكم أنا..

اللى مبيتجوزش لأى سبب أولا شايل مسئولية نفسه بس، لما بيعوز حاجة بيجبها من غير مايفكر أو تفكر إن لسه مخلصوش  اقساط التلاجة و حفاضات العيال… تتفرج على التلفزيون براحتك من  غير ما جوز يتحكم أنه عايز الماتش أو مراتك عايزة “حريم السلطان” … تقعدى براحتك كدة محدش يطلب منك حاجة طول ما هو قاعد… اصل الزوج المصرى لو قام عمل له كباية شاى يجيلوا شد عضلى على طول… تنام براحتك .. تصحى براحتك.. متقفشيش أن واحد بكرش قاعد جنبك طول النهار يغازل فى المشجعات من البرازيل و المانيا .. يا راجل عيب عليك “بص لكرشك الأول” تحسى أن كاس العالم بقى الد اعدائك.. و أنت مراتك متقرفكش بأنك مقضى اليوم على القهوة أو فى الجيم أو بتلعب بلاي ستيشن..و الأهم من كل دا على فيسبوك مش كل مانت و انتى  تحطوا بوست … التانى ياخدها على نفسه.. اعمل POSTs زى مانت عايز يا معلم… و غير كدة ليك مطلق الحرية انك أو انك تشتغلوا الحاجة اللى بتحبوها من غير التزامات  مادية و معنوية… بلاش وقتك لنفسك و شغلك و عائلتك و صحابك .. والنبى فى حلاوة كدة..

اوعوا تفتكروا إنى ضد الجواز ..!

بالعكس بس أنا عندى مشكلة لنظرة المجتمع للعنوسة.. كلكوا بصيتوا على الجزء السيىء حبيت اوريكوا انكوا نسيتوا كل الحاجات الحلوة دى..و إن ممكن حد متجوزش يعيش اسعد بكتير من حد اتجوز.. فاللى شايف العنوسة مرض لازم يكشف نظر لانه مش شايف حاجات كتير للأسف المرض عندك انت لإن العنوسة كنز لا يفنى…!

تحياتى

مقالات ذات صلة

اترك تعليقاً

زر الذهاب إلى الأعلى
إغلاق
إغلاق