وجهات نظر

هانت العشرة.. بسهولة كده

العشرة دي أيام والأيام جابت سنين و السنين جابت العمر.
العشرة دي اللي بتخلينا نرجع يوم لما نفترق …اللي بتخلينا نتصالح يوم لما بنتخانق …بنضحك يوم لما بنفتكر.

العشرة اللي بتخلينا في عز العصبية ندخل أوضتنا ونخرج نكمل الكلام وكأن ما فيش حاجة حصلت قبلها.

العشرة بتخلينا يوم لما تكون مضايق و تقول أنا عايز أقعد لوحدي تلاقيني جنبك وبشرب القهوة معاك حتي لو من غير ولا كلمة، بس الأهم أنك قاعد قدامي.

العشرة اللي خلتك في يوم تتعب علشان سمعت إن الطرف التاني تعبان.

العشرة هي اللي ما فيش فرق مين يدفع الحساب والفواتير.

العشرة هي اللي تبقي حافظ تفاصيل الطرف التاني وعارف حيقول إيه وعارف رأيه وعارف لما تكون متخانق حيصلحك أمتي .. هي الرصيد اللي يخليك تدق الباب ومتأكد أنه حيكون مفتوح في أي مكان وزمان.

العشرة دي ريحة من أغلي العطور .. ريحة سنين ومشوار في أحلام ونجاح وفشل وفرح وحزن وذكريات سفر وصور متعلقة علي الحيطة والفصول الأربعة اللي كنا ممكن نمر بيهم في يوم واحد، وحضن دافي، بتوجع و بتبقي شبح بيطاردك في وسط اليوم وكابوس بيقلق في عز النوم لما بتهون علي اللي ما عرفش وماصنش العشرة.

معقولة هانت العشرة

الوسوم

مقالات ذات صلة

زر الذهاب إلى الأعلى
إغلاق
إغلاق